EmooO وحتوتة كان يامكان في أسطر ^^

[EmooO]

السولاااااااام عليكم
للي متابعني تراني رجعت من تاني خخخخخخ
طبعا كان الاسبوع الي فات اسبوع اختبارات.... تلاته ايام ويوم المناقشه حقت مشروع التخرج حقنا
بالمختصر يوم المناقشه ... شوفتو كيف غادوو سوت مناقشتها وهدايا وفله ومدري ايش واشياء فرحت فيها اللجنه هههه انا سويت العكس مدرسينا شكلو قالو ليتنا كنا في جامعه غدو ههههههه
جيت بطولي لبست ايس كاب وحطيت عطر عشان اهو اقلها جبتلهم ريحه حلوه
فبس اهم شي انو ضحكت معاهم وعدت على خير واخر شي قلت بقول كلمه في حق الدكتور رضا بأنو من افضل المدرسين واشكرو على صبرو علينا ..قالي المدرس شكلك تبغا لدرجات بس هههههه... رضا دا المشرف عليا في المشروع....فبس قلت لا والله الي يجي من ربنا حلو وانا قابل بس بجد افتخر باني درست معا دولا التلاته مدرسين " كانو 7 وأشرت على تلاته خخخخ" لانو اربعه مادرست عندهم
بس دعواتكم انو تكون بين B+ او A
الله يسهل

....................

طويب نرجع للذكريات للي يحب كتاباتي اشكرهم طبعا وبعدين ارد على الي سابو تقيمات ليا اشكرهم كووووولهم واسوري على التأخيري .. أسوري يعني أعتذر
بسم الله

كان يامكان .............

أيام الكليه
حقسمها على موضوعين لانو طويله مشاءالله وفيها ذكريات حلوه
طويب
أول ماتخرجت من الثانويه بنسبة 80% رحت قدمت على طول على اول شي البترول والمعادن .. سويت الاختبار الاول وماعديت ... تاني شي رحت على جامعة الملك عبدالعزيز ..ماقبلوني .. تحطمت وكنت بقعد عاطل تيرم وادخل الجامعه التيرم التاني او اقدم تاني اقصد ... بس سمعت من اقاربي عن كلية ينبع وينصحو فيها والذي منو .. رحت انا واخويا قدمنا عليها سوا .. دخلن الاختبار اخر يوم لانو كانو حسب الحروف مو حسب المعدل .. وسبحان الله حليت صح وجبت درجه من 114 سؤال 90 .... و كتبو اسمي في الجريده حركات خخخخخ. وبس الحمدلله انقبلت

......................

عاد كانت الاجازه الاخيره الي اسكن فيها معا اهلي وقتها لانو كنت بروح بلد جديده وحياة جديده ..
رحت الكليه معا ابويا لانو أستحاله ابويا يخليني وقتها اسافر بسياره لوحدي معا اخويا قريب ال 400 كلم...... كان وقتها طريق ينبع القديم .. مدري لو احد فيكم راحو بس كان طريق خط واحد رايح جي وضيق بس حماس والله ههههه .... فبس حطينا الرحال في الكليه واخدنا الكتب والسكن .. نزلت في مبنى رقم 3 غرفه 315 الدور التالت فوق اخر دور ... الغرفه دي بعدين سميناها بال " SHULTER" الي معناها الملجأ وراح اقولكم ليش بعدين خخخخ .

....................

المهم فلما راح ابويا وسابنا اعتبرت داك اول يوم في تاريخي كوووووووولو اعيشو بعيد عن اهلي وانام في مكان غير عن بيت اهلي فتخيلو الوضع كيف .. صراحه كنت انا شخص احب الجلسه معا الاهل وكدا ففقدتهم اول اسبوع .. لاحظو اني قلت اول اسبوع بس ههههههه

.....................

اخدت على الوضع انبسطنا اخر انبساط وفليناها فل مابعدو فل .. كونا شله من 13 واحد اول تيرم ولا نفكر ندرس ولا شي ههههه .. كان التيرم دا تيرم فيلو رمضان وزي منتو عارفين زومان كان رمضان دراسه ... فقضينا برضو اول رمضان بعيد عن الاهل وصراحه كان بسطه ... جبنا عدتنا وكنا نطبخ في الغرفه وبرضو نشتري من بره .. كنا نقعد سهر لين اخر الليل وايام ماننام خير شر ....... وصح أٌولكم ليش سمينا الملجأ على غرفتنا وكنا حاطين ورقه على الباب بالاسم دا لانو كانت هيا جمعة الشباب وفيهاكل وسائل الترفييييه نلعب بلوت والبلايستيشن والمسجل والفدييو وكل شي ... كان اي احد من الشباب ينام فيها فك الباب خش ونام او اقعد او فك التلاجه الي تحبو تقولو ... مره نمنا في الغرفه 7 انفار ههههه .. مو مره مرات كتيره اي احد تعبان حط راسو وصحي ... فكانت بصراحه حياه فله وبسطه

.....................

نهاية أول تيرم الي حصل للشله حقتنا التالي:
انا معدلي كان 1.4 .. واخويا نفس الشي .. وباقي الشله نفس الشي مره معدلاتنا كانت طايحه جدا جدا ... فدخل علينا التيرم التاني واهو ادوفرنا على حالنا ... كان نفس مواصفات التيرم الاول بس زياده انو في مذاكره عشان كنت تحت الانذار لازم ارفع المعدل اقصد .... واصلا الي كان هالكني هوا الغياب .. يعني كنت احضر يوم ويوم اغيب لين اوصل الحد النهائي للغياب في كل المواد بعدين اشد حيلي من تاني ههه يعني مخ تنكه

.................

جلستنا سارت اغلب الوقت في الغرفه لانو عندنا كل شي ... كنت العب كوره بس بقله في الكليه.. كنت اروح الريكريشن حق الكليه نلعب هناك تنس طاوله او بلياردو او حتى فرفر .... تاني تيرم في الكليه تعرفت على مدرس الرياضه حقنا في الطياره ومنها قالي لو تبغا تعال تمرن معانا سله ... هوا شافني كد اطويل وهبيل مربع مستطيل ههههه .. فسبحان الله دخلت السله وانا ماعرف عنها شي ...تيرم واحد تمرينات وغشامه وكل شي تيرم كنت لاعب اخر واحد ينقو ترا والله هههههه لانو الي يلعبو معانا كانو لعيبه عليهم الهيبه مشاءالله .. فبس تيرم قضيتو تدريب وكل شي ..لانو انا بطبعي مجتهد لو حطيت شي في بالي احاول اتقنو اول شي بعدين العبو كويس واسير فيلو فيلسوف.. فكنت اضيع وقتي بعض الاحيان في السله بشكل خاص ..تلاته ايام في الاسبوع سبت واحد وثلوث.

..................

المهم تاني تيرم خلص وكانت جلستنا زي ماقلنا هيا هيا دي لعب وفله وزنبطليطه والذي منو .... ففي نهاية مرحلة الاورنتايشن حصل التالي للجروب حقنا:
تم فصل 5 منهم فصل نهائي بلارجعه
اخويا رسب في الانجليزي وكان لازم يعيد تيرم كومان انجليزي .... وانا الحمدلله رفعت معدلي وجلست في الكليه و كان معانا طبعا 5 ..فشلتنا نقصت للنص ..طبعا نقيت تخصص أسمو INSTRUMENTATION TECHNOLOGY
تخصص حلو ورهيب وخطير ويحتاجو في الصناعه بكتره مشاءالله
فبس زي منو شايفين انو حياتي اول تيرم بعيد عن اهلي كانت اشبه بالفله الي بصراحه كنت لازم اخد بالي من نفسي شويه من ناحية الدراسه
بس ايش نقول الي ينفلت فجأه يسوي الهبل ... بس ارجع واقول انو الحمدلله هبلي ظرني انا بس يعني ماكنت اظر احد غيري هههههههه

.....................

خولاص بكدا خلصت السنه الاولى ديك الي بصراحه جربت فيها كل شي جديد في حياتي وكانت بلامنازع من احلا سنين عمري بجد لو ماكانت الافضل ... تعرفت على عالم جدد من مختلف امكان السعوديه .. جده الرياض مكه الشرقيه ينبع الخ الخ ..جربت اشياء جديده بعيد عن الاهل ...اعتمدت على نفسي اكتر واكتر.

....................

أفتكرت دا الموقف ههههههه أحكيكم هوا
وصح مو انا قلتلكم ابويا كان مايخلنا نطلع بالسياره هههه .. هدا موقف يضحك .. أول مره طلعنا بالسياره من ينبع لجده كان التيرم التاني طيب .. لانو أول تيرم كنا ننزل لجده بالطياره في رحلتنا المعتاده الساعه 10 الليل كانو يسموها رحلة الاخوين شوقي " انا واخويا ... مره اتفقت انا واخويا ننزل بالسياره ونزل معانا صاحبنا في مكه طيب .. وقتها نزلنا بسيارتو هوا لانو كنا نشحن السياره لينبع عشان تكون معانا سياره هنا ...فاتفقنا انو ننزل من ينبع بالسياره ومعانا صاحبي ...نزلنا وقلنا لابويا مايحتاج تجينا المطار لانو صاحبنا بياخدنا ههههه .. ووقفنا السياره في بيت في الحاره بعيد عن بيتنا ههههههه .. صاحبنا كان في مكه طيب ... المهم جا يوم الجمعه وقلنا لابويا انو صاحبنا بيجي ونروح المطار ان شاءالله .. هداك المتخلف اتأخر وجات السعه 9 وقلنا لابويا انو رحلتنا 10 ههههه تورطنا .. فبنفسو ودانا المطار ونزلنا ودقينا على صاحبنا قلنالو يالله تعال المطار خدنا عشان نروح للسياره هههههههه .. سوين هبل مالو داعي كولو عشان الكدب حبلو قصير بس الحمدلله عدت على خير

....................

طيب
بعض الاشياء الي افتكرها في اول تيرم :
كنت في منتخب السباحه ... كنت ادرب معاهم وكل شي طوال التيرم .. جا اخر اسبوع قبل بطولة ارامكو ... همممم وانا بصراحه ماحب البطولات وعالم الشهره وكدا معرف ليش من ربنا هههههه يعني احب اكون فنان تحت الظل اكتر من انو اكون برة الظل والعالم كولو يشوفني ... كنت من الافضل في الفريق الحمدلله بس زي ماقلت لما سمعت انو الهرجه فيها بطوله فضلت انو ماشترك كلمت المدرس بس قالي لازم تشارك .. والموضوع مو غصيبه وي ...فبس داك الاسبوع مارديت على اتصالات المدرس حق الرياضه حقنا مرررررررره لين شافني في الاختبار النهائي وقالي فينك يابني قلتلو تعبان هههههههه قالي الف سلامه عليك بس زعل شكلو ..ايش اسوي ماحب طيب

.....................

من الاشياء الي فاكرها برضو وماتتنسي أول سياره ليا اخدتها اول ماخلصت الثانويه .... لما تخرجت من الثانوي كنت ماعرف اسوق سياره جير عادي ... فبس مسكت معايا ابغا اسوق .. قمت طلبت من ابويا مفتاح السياره حقتنا الي كانت قديمه وكانت للسواق .. ماخدت السياره معايا اسبوعين او اتوقع تلاته بالكتير الا مسكينه راح راس المكينه حرقتو هههههههه وتصليحها يبغالو مكينه جديده .. وفوق دا ماتعلمت كويس ...فبس رحت لجارنا قلتلو بتعلم فكان يعلمني شويه وبرضو ماكنت اعرف اسوق كويس ... فجا وقت انو اطلع رخصه عشان ابويا قال "لو تبغا سياره جيب رخصه" .. كلمت جارنا وشافلي واسطه في مكان دله حق تطليع الرخص ...فرحت على دله عشان اقابل الواسطه دا ... لقيتو مسافر ..بس اوراقي كانت كامله فقلت ياولد يامحمد طالما انتا هنا ليش ماتجرب تاخد الرخصه ... فدخلت الاجرائات الي تدخلني على الاختبار ..سبحان الله من عند ربنا تيسيرت وكل شي.... وبجد والله وقتها ماكنت اعرف اسوق كويس سياره جير عادي ههههههه .. المهم نجحت في اول اختبار وجيت A يابختي ... فدا خلاني ادرس تلاته ايام دوره حقت صيانه بس.....جا موعد الاختبار الاخير فكنت جالس في كراسي ..اصحابي قالولي انواع السيارات حقت الحكومه كرسيدا او كراون كراون .... وكنت افضل الكريسيدا لانو سوفتها اسهل .. حظي انو اول ماخرجت من الباب كانت كراون فسويت نفسي اعمى مو شايف الرجال والشرطي يدق بوراي مسكين ههه طنشتو لين خرج واحد من البوابه زيي اشرتلو روح للكراو الشرطي يبغاك وراح وشويه بعدها جات الكريسيدا ههههه ...المهم دخلت الساهر واول مادخلت قلت بسم الله بصوت عالي فراح الشرطي و طالع فيا وقالي انتا من مكه؟ ... انا مو من مكه ولا شي بس قلت طالما انو هوا فك الموضوع خليني اسايرو ..فقلتلو يب وجي انجح عندكم ان شاءالله ..قالي ولا يهمك .. اشوف عالم ترسب وعالم تتضارب وعالم تترجى ..انا قلت رحت فيها .. لما مشيت ماشي على الاول من يوم مشيت ..قالي يالله غير .. قلتلو مو هوا انتاالي لازم تقولي متا اغير ههههههه قالي روح يمين ..روح يمين ..قابلت خط اصفر وهديت , قالي ليش هديت قلتلو عشان لو في احد يعدي الاولويه لو ههههههه قالي مشاءالله فنان هههههههه ... روح يمين وقف .. ولا اقل من دقيقتين ..قلتلو هنا حلبق السياره؟ .. قالي لاخلاص أنزل ناجح 25 ..قلتلو ياهو 25 اقل شي ليش اعطينا 30 ..قالي لا اكتر شي ههههههه ..فبس نجحت ومن هناك على اختبار اللوحات وبعدها الصيانه وسبحان الله تسهلت من عند ربنا واخدت الرخصه وريتها لابويا وقبل لا اخش الكليه جابلي السياره المرحومه الي عاشت معايا 4 سنوات حلوووووووه وكانت اول سياره خاصه فيا فورد الفوكس



وقتها كانت حلقات طاش ماطاش حقت فؤاد والفوكس الكوستنائي لما يقولو هدا كوستنائي مو تركواز .. وشوفو البزوره حقون حارتنا كيف يطفشوني فيها ههههههههه
وايش في كومان امور ماتتنسي همممممم أتوقع دي بس على كدا وقفت اموري معا والباقي شوية مواقف طيشان شباب صعب ذكرها ههه بس الحمدلله كانت حياتي حلوه وكالعاده عشتها كيف ماجات :)
الحلقه الجيه عن تلاتة سنوات التخصص في الكليه
أشوفكم بعديييييييين أن شاءالله
وان شاءالله بعد صلاة الجمعه أرد على الي قيموني قبل وبعد
سولامووووو

[EmooO]

سووووري لو تأخرت عليكم
بس تعرفو الاختبارات والذي منو ههههه
دعواتكم اهم شي
طيب كم تقيمه حلوه جاتني ربي يسعدكم عليها



ههههه يأخوان والله البنت دي عسل ورهيبه ههههههه
ليش مانزاكر ... اتهمتي جنس كامل انو مايذاكر بس لانو انا قلت ماذاكر هههههه .. طيب وهما مساطين ايش ذمبهم ههههههه ... ويب انا كدا لما احس بالخطر اشد حيلي معرف ليش سبحان الله ... اهبل مخي ناشف اعرف اني شاطر والله بس مادري الكتاب في صوب وانا في صوب ولا لما اذاكر اجيب درجه حلوه والله هههههه .. يالله الحمدلله على كل شي سار وحيسير طبعا خخخخ .. ابعي طرقتي واتمنا مايكون كولامي الكتير اهم شي مطفشكم ههههه
لو طفشتي سوي زي اكترهم سطر وسطر هههههه
منوره يادودي وموفقه في اختباراتك



ههههههه منورنا يامحرر هههههه .. لا جد والله ترتيبك رهيب .. لو حياتك كدا برضو احسدك عليها ترا مشاءالله مرتب الشباك ترتيب هههههه الله يزيدك ياعم
وانا متابعك لانو تقدم شي حلو ^^ ... حياك الله في شباكي اني تايم



خخخخخخ دي برة الموضوع .. بس فين وفين موكا تقيمني فقلت انزلها لانها وسام حلو هههههههههه
الله يسعدك ويوفق الكل يااااااااارب



ههههههه حتى دي من برة الموضوع بس حبيت اقول لنكوزا الهرجه انو اهو جاوبت على موضوع ينبع ههههه .. فخمتي نكوزا كيف انا من بلدكم الحبيتشه ينبع هههههه
منوره .. والله يوفق الكل يارب



هلا وغلا بدودي شرطه هانم اسفرت وانورت حيااااكي خخخخخخ ...حبل الكدب جدا قصير ويورط بعض الاحيان زي ماسار معانا بس الحمدلله تداركنا الوضع خخخخخخ .. عشان السياره يب لانو تطفش الطياره والله :( .... هيا الغرف صغيره ... بسو لو قلت ماتفضحي لاخوكي كيف اوكيك هههههه ..شوفي ايام الغرفه كنا ساكنين في غرفه فيها سرير من دورين سار واحد فوق وواحد تحت طيب .. اتلاته تحت السرير بالطول سارو كم خمسه .. واتنين بالعرض هههههه عاد حليها وبتلاقي انو صحيحه هههههه ...فكرتيني انزل صوره الغرفه ان شاءالله ازودها قريب .. سلمي على اخوكي الي ماشوفتو في الكليه معايا هههههه .. منوره

ليا باااااااك طبعا

[EmooO]

السولام عليكم
ادري ادري
باااااااااااااااخ حقت الغبرا ههههه
ايش اسوي ..قبل فتره جاتني ظروف خلتني اكره الكتابه واهو الحمدلله شويه شويه رجعت
والي رجعني سبب حلو ..
العاده انا اكتب عن تاريخي بس انا وقفت عند اول ماتخصصت صوح خليها على قدام شويه عشان ارجع اكتب عنها بعدين واطفشكم بالكولام الي ادري تنطو سطرين وتقرو سطر من طولو ههه
طويب
.
.
.
الموضوع ومافيلو انو قبل رمضان بكم يوم نزر بيتنا نونوه جديده وهيا اول حفيده في العيله
اخويا جاتو بنت مشاءالله تبارك الله ربي يحفظها زي القمر .. يعني زادو القمارين في الارض وحده زياده هههههه
حوسو ياشباب مين تتزوجو من كترتهم مشاءالله ههههه
وفي الاسبوع الي فات طبعا فرحه ..فقررو يسوو يارب يارحماني بسيط للاهل بس .. والرجال يسوو عزيمه كبيره ... عاد حق الرجال مشاءالله تملا خلق .. والحريم كان حلو صغير على قولة اختي وحلو
ففي كم صوره احب اوريكم هيا معا احداث الصوره تحتها طبعا ^^



هدي الهديه من اخواتي نزلت معاهم واشتروها لام البنت وكان شي حلو منهم مشاءالله ... واصلا نحنا كاخوان اشتركنا واشترينا كدا بنجره حلوه دهب ..اتنين مو وحده صغنطوووطه ههه .بس كانت من اوائل الهدايا في العيله ههههه



وهدي الغرفه حقتها وقتها في المستشفى
عاد وقتها لسع ماشوفتها وجوة الغرفه دي اول مره اشوفها ... لما شوفت البنوته خفت اشيلها ههه مررره صغنطوطه ربي يحفظها ههههه



هدي برضو في المستشفى .. حلويات والذي منو من الهدايا الي جاتهم
وانا بس اكل هههه
بالعااااااافيه ولا مو



هدي يوم السابع ... والحلو انو بجد كل شي سار هنا تزبيط بيتي ههه .. حتى الله يكرمكم المغسله ماكانت تجيب مويه قمنا اشتغلنا سباكين ولا جبنا احد هههه .. والتركيب حق المسجلات والسماعات وكل شي .. الحمدلله على كلامهم طلع شغل عدل الحمدلله



ودي مكان ماشغلو الاغاني والذي منو .. تزبيطي انا خخخخ .. شي مو



وهدي الهدايا الي غلفوها برضو في البيت وكل شي
...............
وبس
قبل لا اختم احب اشكر اخويا يوسف
قولو ليييييش
لانو يوسف سوالي اغنيه خاصه باسم البنت " ماريا " بصراحه طلبتو وماخيب رجايا
ورحت قابلتو و اخدتها منو .. اول ماشوفتو قلتلك شكلك مختلف .. يقولي احلا ولا مو هههه ...قلتلو لا اقصر هههههه
ربي يسعدك ياخويا يوسف واي شي تحتاجو رقبتي سداده

وبس دا كان اسبوع قبل رمضان
............
اشكر كل من اهداني شي بمناسبة رمضان والله يجعلو شهر خير عليكم يارب
وبس ربي يسعدكم
شويه برد على التقيمات القديييييييييمه الي كانت مرسله ليا من الاعضاء اسف لانو مارديت عليها ^^
بايوووووو

[EmooO]

وحشــــــــــــــــــــــنــــــــــي قــــــــــــــــــــــــاد كدا
صفحتي الحبيبه رجعت
تغربت عنك والسبب النفسيه كانت مش ولا بد لفتره طويله ..لكن الحمدلله
تعرفو علاقتي معا الكتابه الحره من متا؟>> على وزن المصارعه الحره خخخخخ
يمكن من اربعه الى خمسه سنوات طبعا السنه الاخيره دي مو محسوبه لانو هيا الي قطعت فيها

زومان كنت اكتب في دفاتر خاصه بيا اقرب ماتكون مواضيع مو مذكرات ..وبصراحه كولها ضاعت
وبعدو سرت اكتب فس سبيسي العزيز الي رجعت لو دحين
وجا الوقت انقل اموري لهنا
الكتابه في دمي

ولو انو يكون ماليها داعي او وت ايفر من ناحية المضمون بعض الاحيان هههههه لكن الكتابه الحره شي بجد يفرحني معرف ليش احس كأنو أدمان ماقدر اسيبو ولو سبتو ارجع لو واحن لو

فبس أتمنا انو أكون اقلها اسعدكم بشي انا احبو ولو انو زي ماتقولو كولكم طويـــــــــل لكن مشوها معايا عاد ههههههه والي عندو اي انتقاد او نصيحه او استفسار كالعاده والله الصدر يرحب بالكل
ولاكم بيكم

طبعا وقفت في صفحات مساحتي على تلاته سنوات الكليه بعد السنه التحضريه فبكتب علاقتي معاها من هناك معا امور حياتي وقتها
بسم الله



كان يامكان ..........

هدي غرفتي الجمليه أيام الكليه ... أدري باين عليها كانو حاكمها او شي ههههه
لا بس تقدرو تقولو انو حطينا اللصقات وكل شي جات على فترات عباطه معا المسؤول حق السكن وكدا فحبينا نسوي شي بس للعباطه فحطينا الصور .... مأقول اني مو غلطان لكن دا الي حصل ... المهم حبيت اوريكم الغرفه بس للي مايعرفها.

أول تيرم تخصص بصراحه كان نفس حالتي السابقه حقت اول تيرم في الكليه ...كنت طفشان من الدراسه ومواد تخصص ومصطلحات جديده وحالتها بالبلا ..وغيابي كان كتيييييير كالعاده وفي مدرسين بصراحه مايدخلوالمزاج

علاقتي معا المدرسين العرب خاصه مرررررره سيئه... مو سيئة مضاربه وكدا لا اقصد كدرجات ليا ... خاصه المصاريه والاردنيين وعلى حظي التيرم هداك اتنين واحد مصري وواحد اردني بجد الله يهديهم
لدرجة وصل انو لما نقولو يادكتور والله أسالتك صعبه وانتا خلقه ماتشرح كويس يقول " .. الامريكان طلعو للقمر وانتو لسع تقولو أساله صعبه ماتفوئو بئا ....." هوا عندو وجهة نظر صحيحه لكييييييين لو كان حضرتو يعرف يدرس او يدرس صح ديك الساعه اقولو جيب الاختبار الي تبغا بعد ماتدينا المعلومه صح ... لكن في حالة كنت حظرتك سيء صدقني لو اخترعنا معاك صاروخ بينفجر وهوا في الارض لسع ماطلع فوق ههههه... فجد شي يقهر يسوين محافظين على امانه التعليم وهما في وادي والتدريس في وادي. اول تيرم رسبت في مادتو ونجحت في البقيه لكن معدل طايح بس رفعتو تاني تيرم طبعا.

.............................

علاقتي معا الرياضه التيرم دا زادة بكتره لانو زي ماقلت ماكان عندي شي غيرها كانت الاحب لقلبي ... تعلمت السله وسرت تالت كبتن عليهم يعني لو غاب الاول والتاني انا التالت ...... ودخلت دواري وا جبت مراكز وبرضو دخلت دوري كورة القدم ...وجبت هدف احلا هدف في البطوله من نص الملعب خخخ لا اعجبكم ترا فنان ... لكن بصراحه فريقنا كان سيء فبس فزنا مباراه وانهزمنا مباراتين خخخخ وخرجنا من الدور الاول ... كان اسم الفريق شباب المدينه عشان اغلب الشباب من المدينه .. فالحمدلله كانت فتره حلوه رياضيه بصراحه جمعت بين كوره وسله وتنس ومشي وسباحه وغيرو وغيرو .

............................

من الامور الي مافتخر فيها ابدا بس حقولها عشان تعرفو إيمو من كل الجوانب وعشان برضو احذر من اصحاب السوء . لانو بجد ليهم دور في حياة الواحد سواء كانو اصحاب سوء او اصحاب خير كولو ليهم دور طبعا .
خلال التلاته سنوات دي سويت شي لاول مره اسوي وماتمنا اي احد يسوي ولا انا أسوي بعد كدا ولا ان شاءالله راح اسوي ........ [mark=#FFFF66]بجد ترا لحد يستهين بقدرة الاصحاب في التأثير بدافع: قول فله ويالله عاد وكدا [/mark]... تحس نفسك تتحمس وتقول يالله هيا بس خرجه والشطان يكون فوق راسك ..... يب انا قلت كدا بس خرجه ...وحده مره في حياتي سويتها ولين دحين ندمان والله وعسانا بس مانعيدها يارب .

المهم الموضوع ومافيلو انو خرجت موعد او زي ماتسموو ديت معا بنات ماعرفهم جابوهم اتنين من اصحابي والسبب لانو كان عندي سياره واصحابي لا " يعني عشان تشوفو كيف الاصحاب يستغلوك او يستخفوك كتييير لو ماتنتبه"..... ماحخش في التفاصيل بس الحمدلله الحمدلله انو خرجت من عندهم والغلط الوحيد الي سويتو انو خرجت معاهم بس ... وبجد مافتخر بالشي دا بس انا قلت حياتي بتكون كتاب مفتوح ويمكن يتعلم الواحد من اغلاط التانين وبكدا تعرفو انو هدا شي غلط ولا عيالنا او شبابنا يكررو . فجد جد خدو بالكم من اصحاب السووووووء

..........................

هممممم طويب خلال الفتره دي اقصد سنوات الكليه طلعلي هم تجميع الفلوس عشان ازبط سيارتي الي صورتها في وحده من الصفحات هنا... ويب زبطتها وعدلتها وكل شي وصرفت عليها فوق ال 7000 ريال اكسسوارات ... كنت اجمع فلوس المكافاه وفوق دا ابويا كان يديني 150 شهريا كنت ارفع منها 50 واخلي معايا 100 اصرفها على اكلي والمقاضي ...فكنت احب تعديل سيارتي مرررررره وهدي صفه متوارثه في اغلب اخواني

...........................

كنا كل ويك اند طبعا ننزل جده الا لو كان في اختبار فنقعد في ينبع ..... ماعرف كيف الحياه او الويك اند في ينبع لانو نادر ماكنت اقعد هناك ..بس مجملا كانت حلوه وهاااااااديه وفله ... كنت احب امشي برجلي ود الي الي مفتقدو بصراحه في الوقت الحالي لانو بجد المشي جدا جدا جدا مفيد فامشو ياقوم بلاش كسل .

..........................

علاقاتي معا شباب التخصص كانت ولازالت الحمدلله حلوه .... كانو يعرفو إيمو شاطر بس الله يهدي حق غياب لكن يفهم ..فكنت اشرح ليهم ممواد خاصه انو الحمدلله انجليزيتي كانت من الافضل في الفصل ولله الحمد يعني الاكسنت وكدا فكنت في واجهة الكلاس لو في سؤال عن اي شي ههههههه ... ولله الحمد كنت محبوب وليا اصحاب كتييييير وزملاء كتييييييير ولله الحمد بجد بجد اعتز فيهم اكترهم ... هوا دا طبع فيا بعدين اقولكم عن شخصيتي اكتر بس بعد ماخلص يومياتي لين يوم التخرج ان شاءالله فانتظروني طبعا .

.........................

على سيرة الواجبات ... كنت احل الرياضيات والانجليزي بس من الهوموركات .. لانو احب المواد دي ههههه .. افتكر موكا اكسترا شوجر تقولي انو في مدرس مدحها عشان الخط والاهتمام الزايد بالواجب فرحت قلتلها المدرس دا لو كنت انا في كلاسو اتوقع بتجيلو جلطه ........ عاد انا في مرات ايام الكليه ماعرف انو في واجب طيب لانو اكون غايب الكلاس الي فات .... قبل الكلاس يمر عليا صاحبي يقولي مثلا في واجب اقولو لا ياشيخ متا يقولي شوفو ههههههه ... افك ورقة اي فور وهاتك ياكتابه دودودودودو ليييييييين يخلص الحبر واحط اسمي وسلم هههههههههه فله كانت ..اخلا شي اني سريع في الكتابه . بس كنت اطلع مرات واحل الهومورك وكدا ..فلما اجيب هومورك مومنقول الشباب يقولو يووووي محمد عندو عيد شكلو مبسوط اليوم هههههه ..ايام حلوه .

وفي قصه تضحك .. مره في رسمه رسمتها على ورقه وبدخلها للكمبيوتر سكانر عشان ارسلها للدكتور على الايميل طيب وماكان عندي سكنر ...فرحت صورتها بالجوال للدكتور وارسلتها لو ..لما وصلت قالي والله انك مخ عبقري ..قلتلو الحاجه ام الاختراع ههههههه .... وهدا مثااااااال على واحد من واجباتي ههههه



كيف بس ... أدري خخخخخخ موكا تعالي شوفي دكتورك ايش حيقول على دي

.................................

برضو ايش في هممممم صح هدا موقف معا الكويزات .. الكويز للي مايعرفو يعني اختبار مفاجيء ..المهم مادة تخصص وكان مدرس مصري ... فادانا كويز مفاجيء وقلنا لاتكفى ومدري ايش قال ياجماعه دا سهل حلو بأا ... والله ماكنت اصلا فاهم في مادتو شي واصلا ماكنت مذاكر فمصيبه في اتنين .. الاختبار كان اختيارات وصح وخطأ ... 10 فقرات ... بجد اقرب مايكون انوصكيت عيني وقلت يالله صح خطأ خطأ صح والاختيار الاول وكدا والخ لين خلصت وسلمت وخرجت اول واحد ....... الاسبوع الي بعدو وزع الاوراق .. مين يصدق اني جبت 8 من 10 ؟ هههههه بس غلطين في الورقه ... فمن دا المنطلق في لقب اطلقو عليا الشباب وهوا المحظوظ لانو سبحان الله حظي كان شويه من السما ... كنت اغيب والمدرس ماياخد غياب فمانحسب غياب مرات وزي كدا اختبارات .. واقول مثلا في اختبار الاب يارب تجيني التجربه الفلانيه وسبحان الله تجي ههههههه.. طبعا مو كل مره تصيب لا مرات تخيب بس اقصد الاغلب ...فمن هنا سارو يسموني المحظوظ... واصلا قصتي معا الكويزات شي رجج مره فوق مرررره تحت وزي كدا ههه وهدي صوره تطلع اختلاف ..مره فضيحه مره عادي في قمة عطائي



زي منتو شافين مره واحد من 10 ومره 7 من عشره هههههه .. هيا الهرجه بصراحه بعض الاحيان تخطيط اقولكم ليش .. المدرس يقول باخد افضل تلاته كويزات ويختبرنا اربعه فاقوم واحد ماحضر او اخبص وكدا .. بس الهبل الي فيني اني ازكي اتنين هههه يالله مشي حالكم
الورقه الي فوق حليت الورقه باللون الاحمر .. وليا قصه معا اللون الاحمر ..قصه عاديه بس تضحك لما افتكرها فحقولها بالمختصر ...مره سلمت هومورك لمدرس باللون الاحمر فقالي : ايش انتا تبغا تعميني ؟ قلتلو لاااا بس اريحك من التصحيح كولو صح خولاص هههه لانو معروف الاحمر للتصحيح
يالله فضحت بما فيه الكفايه عن مستوايا الدراسي .

............................

أدري طولت عليكم بس قاعده الذكريات تنط في مخي
فبس اقول نهايتها السنوات التلاته دي برضو كانت من احلا فترات حياتي ولله الحمد وعدت على خييييير ..درجاتي فيها ومعدلاتي كانت مره فوق ال 2 ومره تحت ال 2 ..يعني فوق تحت فوق تحت لين الحمدلله عام 2005 شهر نوفمبر تخرجت من الكليه وبديت مرحله جديده احكيكم عنها في الكتابه الجيه انشاءالله ^^
استرو ماواجهتو من اغلاط املائيه وكل شي ههههههه وربي يسعدكم وسوري على الاطاله
الى لقاء قريييييييب

.............................

خارج النص : عندي تقيمات منك بالهبل قديمه بجد بجد ربي يسعدكم عليها ..بس مااني من الناس الي يضيع مجهود التانين فبعتبر التقيمه ليا كانت مجهود وحرد عليها كووووولها نفر نفر ان شاءالله وبجد شااااااكر ليكم الجمييييييييع

[EmooO]

[align=center]



اسعد الله صباح كل واحد فيكم
عساكم بخير وبصحه يارب
تعرفوني صوح اخوكم ايمو


.................


عاد لكل مين يهمو ايمو وانشاءالله انهم الجميع بدون تحديد لانو الجميع اخواني واخواتي
طبعا اكيد تعرفو انا الحمدلله تخرجت قبل شهرين من الكليه واخدت هندسه ولله الحمد
جلست الفتره دي حوالي شهرين من تقديمات لمقابلات شخصيه
توقعت انو بتطول فترة عطالتي بصراحه لانو شباب لسع ماتوظفو من دفعتنا يمكن ابو همممممم 5 الي توظفو و همممممم 15 لسه غير الدفعه الي قبلنا
فقلت شكلها بتكون فتره عطاله
بس في دار ابو متعب ربي يحفظو في ناس رهيبين هههههه


ولو انو الشي الي حقولو مو جي على مزاجي لكنو نصيبي ولازم ارضى على رزقي


الحمدلله ربي رزقني بوظيفه ولله الحمد في شركة في الجبيل اسمها cooperheat


كنت مسوي معاهم مقابله قبل شهر كدا .. فسبحان الله دقو يوم التلوت الي فات وقالو انتا انقبلت فتعال حياك الله انظم لشركتنا الموقره....شكلودا بابا نويل جبلي الهديه قبل بداية السنه لانو كنت جوووود بوي ههههههه ترا امزح ... هدااااااااااااااااااا من فضل ربي ولله الحمد


ولله الحمدلله ولله الحمد ماكنت متوقع الراتب دا لانو كنت مخطط على شي عادي هههه بس قالي شي قلت انا باخد كدا هههههههههه فجد الحمدلله يارب


انا اقولكم الاخبار دي لانكم زي اهلي كولكم


فالخبر الاخير انو خولاص بكره السبت رحلتي بروح على هناك والدوام يوم الاتنين ان شاءالله

طبعا ليا شباب هناك في الجبيل من اصحابي بالهبل وكل شي بس والله مادري كيف بيكون وضعي كالعاده بعيد عن اهلي ..خاصه اني الحمدلله يارب احب جلسة البيت والاهل مرررره كتير فلما يحرموني منها كانو قطعو جهاز تنفس عني :( الله يسهلها يارب

برضو معا النت خاصه اني ماحب الكونيكت مثلا او اي شي لا احب نت بيت وبس .... فنقول ان شاءالله انو اقدر ادخل نت لو قدرت لين احصل شقه واستقر وكل شي


فبس حبيت اقولكم انو حغيب الله واعلم لكم من الزمن


يمكن يوم اتنين تلاته يمكن اسبوع عاد تعرفو الانتقال ومالانتقال والنفسيات بتكون مش ولا بد في البدايه يعني نقول ان شاءالله مايطول اكتر من اسبوع...والله يسهلها


انا ماعرف اعيش برة الغربيه وماقدر اغيب عن جده لاكتر من اسبوع فلما اعرف انو بروح شرق المملكه بعيييييييد عن جده تجيني الكتمه ... فبس دعواتكم ربي يسعدكم كوووووووووووولكم


[mark=#FFFF66]
اي احد زعل مني انا اسفيشن على قولة اختي هههههه
واي احد مبسوط مني يارب دوم
واي احد لا دي ولا دي نقي وحده وخد جوابها هههههه
[/mark]


فربي يسعدكم ياعضاء اونو ودعواتكم ليا وعساها تكون مرحله حلوه وجديده في حياتي


أدعولي اهم شي انو .. انا اقولكم اغششكم خخخخخ
"يارب لو لمحمد نصيب انو يرجع يشتغل في الغربيه فأرزقو بوظيفه في الغربيه قريبه من اهلو وربعو واحبابو والبلد الي يحبو ... ويالله انك تكتبو الخير....... "

خولاص غششتكم ايش بتدعو
كل واحد يشوف شغلو خخخخخ

يالله بالتوفييييييييق للكل سواء موظف او موظفه, طالب او طالبه ,عاطل او عاطله ..الخ أو ألخه
وأسف لانووعدتكم انو برد على تقيماتكم الي زي العسل ومارديت عشان انشغلت ..لكن ان شااءلله برد عليها اول ماقدر


وعلى قولتهم نراكم في القريييييييب العاجل لو ربنا كتبلنا عمر.
سولام عليكم ورحمة الله وبركاته



[/align]

[EmooO]

ياللللللللله زومان عنها
برجعها للحياه شويه وبرجع اكتب احداثي يمكن لسع في متابعين لايمو ههههههه
سوري للمساحه
وسوري للي كان متابعني في حالة انو مانقرضو
على قولتهم حسيت احداث الساعه تستوجب انو تفك مساحتك عشان تعلق وترد و تتكلم في امور تساعد اونو للاحسن
وان شاءالله نقدر سوا نسويها
فاستنو عاد فلسفتي المعتاده

رساله خاصه
مكان احساس خالي فنتمنا رجوعها بأسرع وقت

I @M Baaaaaaaaaack

[EmooO]

سولاموووووووووووووو
ياهووووو في ناس تقرالي ههههههههه
اعلق عليهم وعشان النوم حبدأ اكتب بكره

طويب

Bleeding Heart
كـلامـك شـوقنـي للطفـوله :( / متـابـعه

يعني طفولتك كدا كانت زحمه زيي هههههههه
لايحرمني ربي من العيون المتابعه دي
تسلمي والله
ويالله مبغا نقرالك برضو صفحه كدا خطرونه زيك اوكيك


رحيل
عن جد , انتَ آنسآن جدآ جمميل وضريف وحبوب وتجنن وشباكك صبحت علية مرة حلو هههههههه اسعدني صراحة ممتع ويومياتك خطيرة الله يسعدك صراحه احسك انت نور المنتدى هيك احس لا تغيب حتوحشنآ والله يوفقك ومبروك الوظيفه مع :يؤ

جميل وضريف وحبوب وتجنن >> هدي اضحك فيها على عيال خالي الصغار ههههههه
ترا امزح وي مو تقولي هيا خدلك ههههههه
الله يسلمك ويخليكي يارب ..اننتي الي زياده على دول حبوبه و فرفوشه و بسبوسه واي شي حلو ههههه
وكويسصبحتي عليه ..لانو لو مسيتي عليه يمكن ماتنامي من كترة كولامي هههه
انا الي بجد انبسطت انو تقري ويارب تكملي
وان شاءالله ماغيب واقعدلكم كدا شمعه ماتطفي لين تخلص كهربتي او تدفعو فلوس اشتراك :اي:
والله يبارك فيكي .. بس ايت وظيفه هرجي عنها لانو في تطورات خخخ خليكي متاعه
شوووكريا على كل كلمه حلوه ليا

يوسف
يارب

حسستني اني الحرم وانا مادري

الداهيه
عيوني كذآ من متى و انت عندك شوبآآك يسعدك الهي حمآآآآس

عروسه اقول انتي نسيتي اشياء كتيره بعد الزواج ايوه ... من سنة اسكت عندي وقبل لسكت سنة تكلم وانتا ساكت
خليكي متابعه اهم شي عشان كدا فله تنوري
هما يسموني نور المنتدى وانا اقول انك الكهربا الي بونها مافي نور ههههههه
منوره

......................................

سؤاليشن لكل متابع او متابعه بأختلاف الاذواق والاعمار

-تبغوني اكمل يومياتي من محل ماوقفت هنا ؟؟ يعني اكمل على نفس ترتيب ماكنت ماشي اول من اول سنه للي بعدها والخ الخ لين اوصل للايام دي .
-او ابدأ بطريقه اشطح وارجع واشطح يعني من مكان لمكان واحداث دحين وبعدين وقبلين والخ؟مشكل يعني.

منكم واليكم والسولام عليكم واستنا اقتراحاتكم

سانكسووووووووو